Home > La puèšia ad Muratori > E’ capusiér

Sèinza dóbie e’ capusiér,
l’è un gran bèl mis-cér,
se ma un ui piès cmandè,
in che pòst us pò sfughè.

L’è vistid da gènèrèl,
sa sata parèć dunzèl,
s’un èria da pacòun,
te cumun l’è e’ padròun.

Quèl che còunta l’è aparì,
e ló quèst u l’à capì,
us capès da e’ purtamèint,
ch’l’è quèl dl’uniputèint.

Per ló us dà impurtènza,
dà ch’jèlt un vò cunfidèinza,
e’ vò de vó se sgnór davènti,
e ch’us staga sl’atènti.

E’ dirèz tót l’andamèint,
e’ gèstés japuntamèint,
cumé ch’ui pèr ma ló,
e la zèinta la à da tò só.

Quii ch’i pasa da d’ilé,
j’è i prim a dìi bòn dé,
e ló sèrie ui da da dì,
s’un sèc: cus ch’a vlì?

Se ma ló ui stà béin,
t vè de prim zitadèin,
ut prèšènta, u t’intruduš,
e e’ stà ilé a fè buš buš.

Per scapè l’è pèz incóra,
ut spènz per madèt fóra,
pjó sla fòrza che sla grèzia,
e l’aspèta che tal ringrèzia.

S’ jèćć e’ pèr ch’ut dmanda:
t’è capì chi cmanda,
e du che stà e’ putèr?
tal mèni de capusiér!

Ivano Aurelio Muratori

IL CAPO-USCIERE

Senza dubbio il capo-usciere,/ è un gran bèl mestiere,/ se a uno gli piace comandare,/ in quel posto si può sfogare.

È vestito da generale,/ con sotto parecchi donzelli,/ con un’aria da spaccone,/ nel Comune è il padrone.

Quello che conta è apparire,/ e lui questo lo ha capito,/ si capisce dal portamento,/ che è quello dell’onnipotente.

Per lui si dà importanza,/ dagli altri non vuole confidenza,/ vuole del voi col signore davanti,/ e che si stia sull’attenti.

Dirige tutto l’andamento,/ e gestisce gli appuntamenti,/ come pare a lui,/ e la gente deve prendere su.

Quelli che passano da lì,/ sono i primi a dirgli buondì,/ e lui serio dà loro da dire,/ con un secco: cosa volete?

Se a lui sta bene,/ vai dal primo cittadino,/ ti presenta, ti introduce,/ e sta lì a far bus bus.

Per uscire e peggio ancora,/ ti spinge per mandarti fuori,/ più con la forza che con la grazia,/ e aspetta che lo ringrazi.

Con gli occhi sembra che ti domandi:/ hai capito chi comanda,/ e dove sta il potere?/ nelle mani del capusciere!

 

Ultimi Articoli

Scroll Up