Home > La puèšia ad Muratori > E’ ministròun de mi òrt

Fin a ché an sarò mòrt,
a pas e’ tèimp te mi òrt,
al faz per divèrtimèint,
a lavór e a sò cuntèint.

A tir só tènta vardura,
cun amór e mòlta cura,
an dròv né cuncim né vlèin,
sna de stabie per fè bèin.

E’ vèin sò ròba bèla,
tènt che e’ saria da magnèla,
tachèda ilé ma la piènta,
du ch’ui n’è pròpie tènta.

E per fè e’ ministròun,
l’am dà sudisfaziòun,
cla vardùra naturèla,
ch’a n’ò bšägn da cumprèla.

A la còj fin ch’la dura,
mèn mèna che la matura,
una zuchina sina dä,
tre caròti ch’agl’j’è ‘sà.

Dó tré pógn ad fašulèin,
i bšarèll chi pjó grušlèin,
al patati, al bièdulini
la zóca fata a fitini.

Ai mèt i spinèš e e’ pòr,
i fašul e e’ pumidór,
ch’ui dà un bèl culurin,
ad räs fóg sóra e’ vardìn.

Tóta ròba ch’a lèv béin,
ènca se mè an dròv i vlèin,
pu a la taj cun e’ curtèl,
a pèz grós cume un didèl.

Tl’òglie bòn d’uliva,
ch’a tòg tla cupèrativa,
ai mèt drèinta, quand e’ scòta,
sèlèr, zväla e caròta.

Stè batùd te tigamòun,
d’u ch’a faz e’ ministròun,
pin a d’aqua salèda,
e la vardùra tajèda.

L’à dà bulì zirc’un òra,
pièn e sla quèrcia sóra,
us šmòrta e’ fóg apèina còt,
sèinza ardušle un pancòt.

Te ministròun un guasta,
mètie qualche pògn ad pasta,
e’ riš, la curunzèina,
purché pasta znèina.

L’è bòn, mo e’ fat l’è,
ch’a me sò da magnè mè,
sa tót ch’jèlt ch’i ne zòza,
de stabie i sint la pòza.

Ivano Aurelio Muratori

IL MINESTRONE DEL MIO ORTO

Finché non sarò morto,/ passo il tempo nel mio orto,/ lo faccio per divertimento,/ lavoro e son contento.

Tiro su tanta verdura,/ con amore e molta cura,/ non adopero né concimi né veleni,/ solo dello stabbio per far bene.

Viene su della bella roba,/ tanto che sarebbe da mangiarla,/ attaccata alla pianta,/ dove ce n’è proprio tanta.

E per fare il ministrone,/ mi dà soddisfazione,/ quella verdura naturale,/ che non ho bisogno di comperare.

La raccolgo finché dura,/ man mano che matura,/ una zucchina se no due,/ tre carote che sono abbastanza.

Due tre pugni di fagiolini,/ i piselli quelli più grossini,/ le patate, le bietoline,/ la zucca fatta a fettine.

Ci metto gli spinaci e il porro,/ i fagioli e il pomodoro, / che gli dà un bel colorino,/ di rosso fuoco sul verdino.

Tutta roba che lavo bene,/ anche se non adopero i veleni,/ poi taglio col coltello,/ a pezzettini grossi come un ditale.

Nell’olio buono d’oliva,/ che prendo nella cooperativa,/ ci metto dentro quando scotta,/ sedano, cipolla e carota.

Questo battuto nel tegamone,/ dove faccio il minestrone,/ pieno di acqua salata,/ e la verdura tagliata.

Deve bollire circa un’ora,/ piano col coperchio sopra,/ si spegne il fuoco appena cotto,/ senza ridurlo un pancotto.

Nel minestrone non guasta,/ metterci qualche pugno di pasta,/ il riso, la coroncina,/ purché pasta piccola.

È buono, ma il fatto è,/ che me lo devo mangiare io,/ con tutti gli altri che non lo ciucciano,/ dello stabbio sentono la puzza.

Ultimi Articoli

Scroll Up